T.E ကားအိုကြီးကို
အသက် ၅၈ နှစ်အရွယ် ကားဆရာကမောင်းလို့
မကွေး-ကျောက်ဖြူ ခရီးကို အမ်း တောင်ကြားလမ်းကနေ
မိုးထဲရေထဲ သွားခဲ့ပြန်ခဲ့တာ အသည်းယားစရာ
သေခြင်းတရားဆိုတာ ကားဆရာသတိတစ်ချက်မှားရင်
ချက်ချင်းလက်ငင်းကြုံတွေ့နိုင်တဲ့အရာ
မိုင် ၂၀၀ လောက်သာရှိတဲ့ခရီးဟာ
တစ်ညအိပ် နှစ်ရက်ခရီး
T.E ကားအိုကြီးဟာ ရှိသမျှအားအင်တွေကို အစွမ်းကုန်ညှစ်ထုတ်
ကားဆရာက ပညာကုန်ထုတ်ပြီး
မြွေလိမ်မြွေကောက် တောင်တတ်တောင်ဆင်းလမ်းတွေကို
တစ်လက်မချင်း သိမ်းပိုက်အနိုင်ယူခဲ့တယ်
အလှတရားနဲ့ သေခြင်းတရားဟာ ခေါင်းနဲ့ ပန်းပဲ
ရိုးမတောင်တန်းဟာ လှသွေးကြွယ်နေတဲ့ မိန်းမပျို
တိမ်တွေက သရဖူဆောင်းပေးကြသလို
တောအုပ်တွေက သစ္စာရှိရှိ ဝန်းရံလို့ ပေးထားကြတယ်
သေခြင်းတရားကို ကားတစ်ဘီးစာအကွာမှာ တွေ့ခဲ့ရတယ်
ချောက်ထဲက ဆွဲတင်ထားတဲ့ ကားနှစ်စင်း စင်းစင်းသေနေတာမြင်ရတယ်
ကွန်ပြူတာနဲ့ အင်တာနက် မရှိမဖြစ်ခေတ်မှာ
ကမ္ဘာဦးလူသားဆန်ဆန် ဘဝတွေကို ရိုးမက ဖွင့်ပြတယ်
နေရာတိုင်းမှာ ငွေဟာ လူကြိုက်အများဆုံးဖက်ရှင်ဖြစ်ကြောင်း
လွှစက်သံတွေက ပြတယ်
အနိစ္စတရားကို ခုတ်လှဲခံထားရတဲ့
သစ်ပင်တွေကပြတယ်
လူ့အတ္တကို တောင်ကြားလမ်းက ပြတယ်
................................................
အသက်ကို လောင်းကြေးထပ်ပြီး
မိုးထဲရေထဲမှာ ရိုးမကို ဖြတ်ကျော်ခဲ့တယ်
တိမ်တွေအပေါ်ခဏတာရောက်ခဲ့တယ်
ကဗျာတစ်ပုဒ် အမြတ်ထွက်လိုက်တယ်။ ။
ဆေးခါး 18.9.2013 5:45
5:45PM (TDI)
18-9-2013
