ပြည်ကြီးကသာ ဘယာကကင်း ရိုးဖြောင့်စင်းကြောင့်
ချင်းချင်းလေးစား အရေးထားလျက်
တံခါးမပိတ် ဓားမချိတ် အိမ်သားအားလုံးအိပ်ကြသည်။
လူချင်းမှာသာ ယုံရပါလည်း
ရွာမှာပင်မွေး ရွာဝင်ခွေးက
မွေးရုံသာမွေး မပေးကြွေး
ခပ်အေးအေးသာလွတ်ထားရွေ့
ကျွေးကားကျွေး၏ ဝမ်းပြည့်မရ ဝမ်းမဝ
မလှပိန်ချည့်ရှိနေရွေ့။
ထိုသည့်အခြေ ထိုအနေကြောင့်
လူခြေတိတ်ဆိတ် လူတို့အိပ်လျှင် တိတ်တိတ်ဝင်
ခိုးငင်စားရမြဲ။
ခိုးသားမကျ ပါးမဝကြောင့်
ဖွဖွအခင်း နင်းတချွတ်ချွတ် မြည်သံလွှတ်မို့
နားမွှတ်ကင်းပါး ထင်းထင်းကြားသည့်
အိမ်သားအားလုံး ပျားပိတုံးလျှင်
အုန်းအုန်းကျွတ်ကျွတ် တုတ်ဓားခွက်ဖြင့်
လက်ရောက်သူ့ခွေး မိုက်ညစ်ထွေးကို
ဒဏ်ပေးသောငြား ရိုက်ပုတ်ညား
ခါးဝယ် ဒဏ်ရာရစေပြီ။
နံနက်ရှုခင်း လင်းမလင်းသေး
ခွေးခင်းပိုင်ရှင် နောက်အိမ်စဉ်က
လျင်လျင်ခေါက်ခေါက် တို့အိမ်ပေါက်ဝယ်
တောက်လျှောက်လာသွား မှုစကား
အော်လား ဟစ်လား ပြောတော့သည်။
အရေးပေါ်ဆေး ခွေးလျော်ကြေး
ဟစ်အော်ကြွေးရွေ့ တောင်းတော့သည်။
ခွေးအခွင့်ရေး ပေးလျှင်ပေး မပေးတရားစွဲတော့မည်
ကိုယ့်အိမ်ဝင်ကျယ် ခွေးမဖွယ် တုတ်ပင်မရွယ်ရဲ
ကိုယ့်အိမ်ဝင်ခိုး ထိုခွေးဆိုး တုတ်ပင်မမိုးရဲ
ကိုယ့်အိမ်ဝင်အောင်း ခွေးသယောင်း မောင်းပင်မမောင်းရဲ။ ။
