ရှုမငြီးတဲ့ ဧရာဝတီမြစ်ပြင်ကျယ်ကို
အပေါ်စီးကနေ မမှိတ်မသုန်ငေးစိုက်ကြည့်ရင်း
တစ်ချိန်က သင့်ရဲ့မျက်လုံးတွေ
မီးဝင်းဝင်းတောက်နေခဲ့မှာပေါ့
အံကြိတ်ရလွန်းလို့ သင့်ရဲ့မေးကြောတွေလည်း
မြစ်ကမ်းပါးယံနဲ့အတူ ခုံးထနေခဲ့လိမ့်မယ်
သင့်ရဲ့အသက်ရှုသံပြင်းပြင်းကြောင့်
ဧရာဝတီမြစ်ပြင်လည်း ထိန်လန့်တုန်လှုပ်နေခဲ့လိမ့်မယ်
ကိုယ်မြေ ကိုယ်ရေ ကိုယ်ဘိုးဘေးစဉ်ဆက်
အသက်သွေးချွေးတွေနဲ့ တည်ဆောက်ခဲ့တဲ့နိုင်ငံတော်ကို
ကျုးကျော်ထိပါးလာသူတွေလက်က ကာကွယ်ဖို့
သင့်ရဲ့သွေးတွေလည်း ကျိုက်ကျိုက်ဆူနေခဲ့မှာပါ
ကျုးကျော်စော်ကားသူတွေကို သရဲစီးသလို
ဂုတ်ချိုးဝါးမြိုစားသောက်ပစ်ဖို့ တစ္ဆေတစ်ကောင်လို
သင် ကိုယ်ဖျောက်နေနိုင်ခဲ့တယ်
နယ်ချဲ့မိစ္ဆာတွေကို ဧရာဝတီအချမ်းပေးဖို့
သင် အသင့်ဖြစ်ခဲ့တယ်
နေမဝင်အင်ပါယာက နယ်ချဲ့ပရင်ဒါဂတ်ရဲ့
ထောင်လွှားမောက်မာသွေးဆူနေတဲ့ ရေတပ်မတော်ကို
တစ်စစီဖြစ်အောင် သင်ဦးချိုးပြခဲ့တယ်
သင့်ရဲ့ခန္ဓာကိုယ်ကို မိစ္ဆာနယ်ချဲ့တွေရဲ့
သွေးညှီနံတွေနဲ့ လိမ်ကျံပစ်ခဲ့တယ်
သမိုင်းမှာ သင့်ရဲ့နောင်တော်
မင်းလှခံတပ်လောက် မထင်ရှားပေမယ့်
မြန်မာ့သတ္တိ စွေးစွေးနီကြောင်း
မြန်မာ့သေနင်္ဂဗျူဟာ အဆင့်မြင့်ကြောင်း
ကမ္ဘာ သိအောင် သင်ပြသခဲ့တယ်
သမိုင်းပေးတာဝန်ကို ငုံ့မခံတတ်တဲ့ ဇာတိမာန်နဲ့ထမ်းခဲ့
သင့်ရဲ့အမည်နာမကို ကျိုက်ကျိုက်ဆူတဲ့သွေးနဲ့ ရေးထွင်းပြခဲ့တယ်
ခုတော့ ….ဘယ်လိုအလွမ်းတွေနဲ့များ
တိတ်ဆိတ်ခြောက်ကပ် မည်းမှောင်နေတဲ့ ကမ်းပါးယံပေါက်တွေကနေ
ဧရာဝတီကို
သင်တစ်ယောက်တည်း ချောင်းကြည့်နေရတာလဲ။
ဆေးခါး
အမှတ်(၁၃) မေ ၂၀၁၃ ၊ရယ်စရာမဂ္ဂဇင်း
